Havaların isti keçməsi hamilə qadınlara müsbət təsir göstərir. Lakin bu dövrün də öz spesifik riskləri var və diqqətli olmaq hər zaman vacibdir. Belə ki, hamiləlik dövründə hormon səviyyələrinin dəyişməsi və bədən funksiyalarının fərqli işləməsi səbəbindən qadınlar ətraf mühitə daha həssas olurlar. Onların sağlamlığı və gündəlik həyat tərzi isti havalardan müəyyən şəkildə təsirlənə bilər. İstilik və rütubətin artması hamilə qadınlar üçün bir sıra çətinliklər yaradır.

Bunu Səhiyyə Nazirliyi Elmi-Tədqiqat Mamalıq və Ginekologiya İnstitutunun mama-ginekoloqu Gülnaz Rəsulova deyib. Onun sözlərinə görə, yüksək hava temperaturunun həddindən artıq tərləmə, orqanizmin su itkisi və elektrolit balansının pozulması ilə nəticələnmə ehtimalı var: “Bu, susuzluğa və hətta ürək-damar problemlərinə yol aça bilər. Hamilə qadının orqanizminin daha çox suya ehtiyacı olduğunu nəzərə alsaq, xüsusilə yay aylarında suyun kifayət qədər qəbulu olduqca önəmlidir. Eyni zamanda, günəş şüalarının dəriyə vurduğu zərər və ultrabənövşəyi şüaların təsiri də unudulmamalıdır. Hamilə qadınlar dərilərini qorumaq üçün uyğun günəş kremi istifadə etməli və mümkün qədər günün qızmar saatlarında birbaşa günəş şüalarına məruz qalmaqdan çəkinməlidirlər”.

Mama-ginekoloq istivurma və günvurma hallarında hamilələrə göstərilən ilkin tibbi yardım barədə də məlumat verib: “İstivurma və günvurma bədən temperaturunun kəskin artması ilə xarakterizə olunan ciddi patoloji vəziyyətlərdir. İstivurma xarici temperaturun yüksəlməsi və adekvat maye qəbulunun olmaması nəticəsində baş verir. Tipik əlamətlər arasında başağrısı, baş gicəllənməsi, ürəkbulanma və halsızlıq yer alır.

Günvurma isə uzun müddət birbaşa günəş şüasına məruz qalmaqla yaranır və bədənin özünü soyutma mexanizmlərinin pozulması, çox yüksək qızdırmaya səbəb olur. Bu hal sərbəst istilik itkisi mümkün olmadığı üçün bədən temperaturunun daha sürətlə qalxmasına gətirib çıxarır və tez müdaxilə edilməsi məsləhətdir.

İlk yardım tədbirləri sırasında hamilə qadının sərin və kölgəli bir yerə köçürülməsi, bədənin soyudulması üçün kompreslərin tətbiq edilməsi, bol miqdarda su və elektrolitlə zəngin içkilərin verilməsi mühüm önəm daşıyır. Günvurma halında isə baş dərisinin soyudulması və nəfəs almağın asanlaşması üçün sərin bir yerin yaradılması, mümkünsə, ventilyasiyanın təmin edilməsi lazımdır. Hər iki halda əlamətlər davam edərsə və ya kəskinləşərsə, dərhal tibbi yardıma müraciət edilməlidir.

İstivurma və günvurma hamilə qadınlar üçün ciddi risklər yaradır. Bunun təsirindən qorunmaq üçün profilaktik tədbirlərin görülməsi vacibdir. Hər iki vəziyyətin qarşısını almaq üçün kifayət qədər maye qəbulu, günəşdən qoruyucu geyimlər və fiziki fəaliyyəti məhdudlaşdırmaq böyük əhəmiyyət kəsb edir. İlk yardım üsullarını bilmək, erkən müdaxiləni təmin etmək və tibbi yardımı tez bir zamanda almaq bu vəziyyətlərdə önəmli rol oynayır. Hamilələr üçün sağlam və təhlükəsiz bir mühitin təmin edilməsi hər zaman ön planda olmalıdır”.