Yaponiya, Çin və Koreya Respublikası mayın sonunda rəhbərlik nümayəndələrinin üçtərəfli görüşünü keçirmək niyyətindədirlər.

Bu barədə “Yomiuri” qəzeti məlumat yayıb.

Hazırda tərəflər mayın 26-27-də Cənubi Koreyada danışıqlar aparmaq variantını nəzərdən keçirirlər. İclas baş tutarsa, o zaman Yaponiyanın Baş naziri Fumio Kisida, Çin Xalq Respublikasının Dövlət Şurasının Baş naziri Li Syan və Koreya Respublikasının Prezidenti Yun Sok-yol iştirak edəcək.

Onların Şimali Koreya da daxil olmaqla regional məsələləri və iqtisadi əməkdaşlığı müzakirə edəcəyi gözlənilir.

Qeyd edək ki, Yaponiya, Koreya Respublikası və Çin Xalq Respublikasının üçtərəfli sammiti ilk dəfə 2008-ci ildə baş tutub. O vaxtdan bəri səkkiz belə görüş keçirilib, sonuncusu 2019-cu ildə olub. Formatın işi Seul və Tokio arasında məcburi əmək qurbanlarına təzminat ödənilməsi ilə bağlı fikir ayrılıqları, eləcə də pandemiya səbəbindən dayandırılıb.

Ötən ilin noyabrında Busan şəhərində Çin, Koreya Respublikası və Yaponiyanın xarici işlər nazirləri arasında danışıqlar baş tutub; XİN başçıları sammitə hazırlığı sürətləndirmək barədə razılığa gəliblər.

2022-ci ildə Koreya Respublikasında yeni prezident Yun Sok-yol hakimiyyətə gəldikdən sonra Yaponiya ilə ikitərəfli münasibətlərdə istiləşmə müşahidə olunub, Cənubi Koreya Prezidenti artıq Yaponiyanın Baş naziri ilə bir neçə dəfə görüşüb. Bununla belə, “Fukusima-1” AES-dən radiasiyadan arınmış suyun buraxılması səbəbindən Tokio ilə Pekin arasında münasibətlər soyuqlaşıb. Çin Yaponiyanın hərəkətlərini tənqid edib və Tokiodan dəniz məhsulları idxalını tamamilə dayandırıb.